ياسر التويجري

على كثر مادقوا الناس الاقراب
طنّشتهـم لاجـل أتحفـى بجنـابـك
أنا اعرف الباب وأدخل مـع البـاب
والشكـوى لله يـوم صكيـت بابـك
لا يابعد يانـوف عكفـان الأشنـاب
لا جات حـزة شوفتـك واحتسابـك
قولي لقلبك لا يكثّـر علـى الشـاب
قولـي لـه الله لا يحرمـك شبابـك
ان كان قصدك شـي فينـي ولا ذاب
ما شوف شـي يستحـق التشابـك
اللي هرب من زين وجهك للأسبـاب

هرب ولكـن ماسكـت لـه عذابـك
يا نوف انا عقب الصناديد الأعـراب
يوم انهـا علـى الأصايـل مدابـك
اخذت من وايل مزايـا مـن عقـاب
ومن الخوال مطير يكفـي ارعابـك
والظاهر انك منت خايـف ومرتـاب
وما ينحكى عنـدك ولا ينحكـى بـك
يا اقسى من هروش المحاني والألباب
طالبـك تكفـى لا تثـور ركـابـك
اليا زعلت شوي خذ حقـك عتـاب
وأنا لك اسمع لين يقضـي عتابـك
يابـو عيـون كنّهـا عنـة أهـداب
عليك من حبـك التواصيـف حابـك
قدّك عليه من الشمطري والأطيـاب
واللـي يحلـي وجنتينـك حجـابـك
جملة تواصيفك تجي مالهـا اعـراب
بمـوت فيـك الله يجبـر مصـابـك
لا المبسم الوردي ولا ثلجـه النـاب
ولا الجديل اللـي يخـون المشابـك
ولا ارتباكي منّك ولا شدّ الأعصـاب
ولا خضوعي لك وأنـا مـا أهابـك
ان طبت فالملقى معك أورق وطـاب
وان غبت جعلـه مايطـوّل غيابـك
وأنا اللي ألجأ للتـدواي بالأعشـاب
حتى يجيبك دربك اللـي غـدا بـك
الصدق يمكن عيب والضـن كـذّاب
بس الأكيد أن الفقير اللى أغتنا بـك